MORA CON NóS

Que é A Morada?

É o lugar que un día soñamos, onde estar coas nosas nais e fillas, coas crianzas, as tías, as irmás e as amigas, onde estar coas veciñas…esa comunidade que nos sostén e que sostén a vida. Esta é unha casa-acubillo para sertírmonos seguras, escoitadas e acompañadas. É unha casa-corpo na que recoñecernos, respectarnos e amarnos tal como somos. É unha casa de xanelas abertas polas que entra o mundo e saen as nosas ideas. É o cuarto propio para todas. É o xardín onde sementar e florecer cada primavera. Nesta casa coidámonos en comunidade.

Pero, que son os coidados para nós? Sabémonos interdependentes, todos os seres humanos o somos, dende o nacemento ata a vellez.Coidar e ser coidada é unha faceta inseparable da mesma existencia humana. Por iso dámoslle aos coidados a importancia social e política que teñen. É unha responsabilidade de todas as persoas, pero o modo en que está organizada a sociedade empéñase en cargar ás mulleres con esta tarefa esencial. Atributos como o sacrificio, a abnegación e a renuncia relaciónanse con esta suposta natureza feminina que nos fai asumir o rol de coidadoras.

Pero nós non queremos sacrificarnos por nada nin por ninguén, non queremos abnegarnos nin renunciarnos. Estamos decididas a darlle a volta a esta idea dos coidados.

Porque coidar é coidármonos.

É escoitar aos demais e a nós mesmas, ao noso corpo, a nosa sexualidade, as nosas emocións, desexos e ideas.

É soster entre a comunidade as necesidades de todas, sen deixar que ningunha quede atrás, tampouco nós mesmas.

É poder parar, poder dicir que non, poder chorar e rir sen sentirse culpable. 

É recoñecer tamén a nosa vulnerabilidade.

E esixir á sociedade que as cargas sexan compartidas en igualdade, tamén é coidar.

Por iso na Morada poñemos ás coidadoras no centro. Facilitamos que poidan ter un espazo e un tempo para si mesmas, mentres, as persoas ás que coidan, están acompañadas por nós.

Nesta Morada non hai normas, pero si acordos e valores que son primordiais para nós:

• O feminismo como o eixo vertebrador de todo o proxecto.

• Os coidados como aspecto esencial da vida, conferíndolles a dimensión política que teñen.

• A diversidade, nutriente esencial para construír un espazo rico en ideas e sentires.

• A creatividade como a forza que impulsa ao ser humano a crear novas realidades.

• A igualdade baseada na horizontalidade, onde teñan cabida todas as voces.

• A inclusión, sustentada na participación activa de todas as persoas.

• A sustentabilidade e a defensa dun modelo económico que non sexa depredador co mundo. 

• O humor e a risa como ferramentas liberadoras e combativas.

• O cooperativismo para xestionármonos democraticamente e contribuír a unha economía social onde as persoas están no centro.

VÉS MORAR CON NÓS?